Надежите за рехабилитација на автомобилскиот пазар во Европа повторно во нокдаун
Нов голем минус кога станува збор за продажбата на нови автомобили на европскиот пазар во август
Во август на европскиот пазар се продадени 881.897 нови автомобили, што е пад на продажбата за 18% во споредба со постигнатите резултати во истиот месец минатата година. Воедно ова е најмал број на новорегистрирани автомобили во август уште од 2016 година.
Ако се погледне вкупната бројка на продадени автомобили од почетокот на годината – 7,247.341, заклучно со претходниот месец, тогаш процентната бројка е уште поголема – 33% полош резултат во споредба со истиот период во 2019 година.
Водечки сегемент во Европа останува SUV сегментот. И во август, 4 од 10 продадени автомобили припаѓаат на овој сегмент – вкупно 358.100 единици. Но и покрај лидерската позиција во однос на продажбата, SUV моделите имаат пад на продажбата од 12%. Сепак, ова е далеку поблаг пад од оној забележан кај MPV возилата (-44%).
Најпопуларни SUV модели се оние кои припаѓаат на Б-сегментот (Peugeot 2008, Renault Captur, Ford Puma), а на кои отпаѓаат 147.000 примероци. Бројот на продадени SUV единици од C-сегментот е 144.700 возила.
Електрификацијата зема замав и тоа веќе е незапирливо. Во август, еден од пет продадени автомобили бил електрифициран – 188.700 (+ 121%) единици. Ако зборуваме за чисто електрични автомобили, во текот на август се продадени 48.800 единици, што е 111% раст на продажбата споредено со август минатата година.
Титулата бестселер во Европа повторно оди кај Volkswagen Golf. Германскиот хечбек во август стигнал до 22.386 нови сопственици. На второ место е Renault Clio со продадени 16.399 примероци, додека на трето место е Peugeot 208 со испорачани 15.382 примероци. На четвртата позиција е уште еден модел од групацијата PSA – Opel Corsa со 15.261 нови регистрации, додека Топ 5 се заокружува со Škoda Octavia – 15.122 продадени автомобили.
Кога станува збор за продажбата на хибриди (каде се вклучени и MHEV возилата), главниот збор го води Toyota Corolla. Јапонскиот хибрид е продаден во 9.916 примероци, следен od друг модел на таа марка – C-HR, кој во август стигнал до 8.368 нови сопственици. Трет на листата на најпродавани хибриди е Ford Puma со испорачани 6.355 примероци.
Со plug-in хибридите ситуацијата е веќе поинаква. Прв на листата е Ford Kuga со 4.856 автомобили испорачани во август. Следува Mercedes А-класа од која се продадени 3.435 примероци, додека на третото место е VW Passat со испорачани 2.181 примероци.
Најпродаван електричен модел во август е Tesla Model 3 со 6.922 испорачани возила. Renault Zoe е на второто место со продадени 6.136 автомобили, пред Hyundai Kona Electric на третото место – 4.012 нови регистрации во Европа.