Како богатите Руси останаа без луксузни автомобили
Откако италијанските автомобилски компании Lamborghini и Ferrari најавија прекин на бизнисот во Русија, а претходно слична одлука донесоа Porsche, Bentley, Rolls-Royce и Aston Martin, богатите граѓани на Руската Федерација веќе се прашуваат по кои заобиколни патишта можат да стигнат до луксузен автомобил
Италијанската компанија Ferrari ја суспендира испораката на автомобили на рускиот пазар, што и официјално го објави на својата веб-страница. Слична одлука беше објавена и од Lamborghini кој исто така не смета на клиентите од Руската Федерација до дополнително известување.
Според анализата на агенцијата Autostat, Русите во 2021 година купиле 55 нови Ferrari единици (продажбата е зголемена за 90%). Со 200 автомобили, Lamborghini поставил рекорд во продажба во Русија, 48% повеќе од пред една година претходно и 27% повеќе од претходниот максимум забележан во 2019 година.
Марката Lamborghini припаѓа на германскиот концерн Volkswagen Group, како и Porsche, кој е лидер во продажбата на врвни спортски автомобили во Русија. Во 2021 година, 26 дилери продале речиси 6,3 илјади автомобили Porsche, а најпродавани модели се Cayenne и Macan. Групацијата Volkswagen ја потврди суспензијата на испораките на сите автомобили на концернот во Русија, одбивајќи да прецизира кој ќе се занимава со сервисот на продадените единици.
Прес-службата на Porsche во Русија соопшти дека одговорноста за гарантните услуги е на дилерите. На веб-страницата на автомобилската групација Авилон (најголемиот руски дистрибутер на Aston Martin, Jaguar, Maserati, Rolls-Royce, Bentley и Ferrari) речиси и да нема луксузни автомобили во понудата.
Од моделите на Aston Martin, достапен е само еден DBX кросовер од 550 КС. Jaguar F-Pace SVR со иста моќност е исто така осамен во салонот. Maserati е во подобра ситуација со единствениот модел на Levante – ги има уште околу 30 на располагање, додека суперавтомобили од Ferrari воопшто нема – ниту нови, ниту користени. Менаџерот за продажба на Rolls-Royce во Москва најави продолжување на продажбата на најновите автомобили.
Испорака нема, а се очекува состојбата да се расчисти најдоцна во април. И покрај промената на курсот, интересот на потрошувачите за скапи автомобили и понатаму останува, велат во Авилон, но, додаваат дека се уште е тешко да се фокусираат на специфичните услови за испорака на автомобили.
Богатите луѓе без сомнение ќе можат да најдат начини за увоз на скапи и ретки автомобили во Русија, дури и под санкции. Една од овие шеми е трансферот на автомобили од соседните земји, вели потпретседателот на Националниот автомобилски сојуз (НАУ) Јан Хајцеер. „Во догледна иднина, само неколкумина кои живеат во оваа земја ќе најдат начин да донесат суперавтомобил“, додава Хајцеер.
Тој, исто така, вели дека е многу тешко да се скрие некој таков суперавтомобил под санкции. На пример, автомобилите може да се префрлат во Азербејџан, Ерменија, Грузија или Казахстан, а потоа во Руската Федерација. Тој нагласува дека богатите луѓе ќе се обидат да најдат решение.
Друга работа е што таков автомобил ќе биде поскап, а неговото купување е можно за многу тесен круг на луѓе. Рускиот пазар уште некое време ќе остане без суперавтомобили, се согласуваат експертите. Сепак, компаниите оставаат простор за маневрирање и можат да се вратат таму во секое време, штом ситуацијата се нормализира, велат познавачите на локалниот автомобилски пазар.
Но, најлошото сценарио што тие го замислуваат е она во кое производителите се повлекуваат од Русија и се враќаат дури по 10 години. Иако се плашат од тоа, руските трговци тврдат дека Русија е добар пазар, кој бара добри количини, а побарувачката за такви возила никогаш не се намалува.