Швеѓанец фатен како продава тајни на Volvo и Scania на Русија
Обвинителството го обвинило 47-годишниот консултант за шпионажа
Шведското обвинителство обвинило 47-годишен сонародник за кражба на трговски тајни и други информации кои потоа ги продал на Русија. Човекот работел како консултант за Volvo Cars и Scania во Гетеборг, а информациите што ги дал се сметаат за многу важни за двете компании, како и за националната безбедност на Шведска.
Обвинителот во случајот, Матс Јунгквист, за локалниот весник Morningstar открива дека обвинетиот ги преземал информациите од неговиот работен компјутер на свој лаптоп, а потоа и на флеш-уред, обидувајќи се да ги скрие своите активности од ИТ одделот на компанијата.
Човекот е уапсен во ресторан во центарот на Стокхолм за време на состанок со руски разузнавач кој работел во Шведска под дипломатско покритие. Непосредно пред апсењето, консултантот во Volvo Cars од Русинот добил 27.800 шведски круни (3.360 американски долари).
Според Јунгквист, ова било една од редовните исплати на Швеѓанецот, кој им пренесувал информации на Русите скоро три години. Во овој период, човекот добил најмалку 300.000 круни (36.135 американски долари). Максималната казна за ваквите постапки според шведскиот закон е 6 години затвор.
Во посебна изјава, шведскиот директор за контраразузнавање Даниел Стенлинг истакнува дека во последниве години бројот на случаи на индустриска шпионажа во корист на други земји постојано се зголемува.