Позната автономијата на новиот Kia EV6 за европскиот пазар
Електричниот кросовер EV6 наскоро ќе пристигне во Европа, а сега се знае и колкава автономија со едно полнење ќе има
Kia ја објави палетата варијанти на моделот EV6, кој ќе дебитира пред европската публика во септември, на салонот во Минхен. По овој настан, треба да започнат испораките на првите единици од овој модел на Стариот континент.
Верзијата EV6 со еден електричен мотор кој ги управува задните тркала и се напојува од батерија со капацитет од 77,4 kWh со наполнета батерија ќе може да патува 528 км. Со варијантата со два електрични мотори и погон на сите четири тркала, опсегот е секако нешто помал и изнесува максимум 508 километри.
Сите изданија на Kia EV6 можат да користат полначи од 400 и 800 V. На најбрзиот полнач, овој електричен автомобил може да наполни 80% од капацитетот на батеријата за само 18 минути.
Јужнокорејската марка исто така објави дека продажбата на најпотентното издание, EV6 GT, ќе започне малку подоцна од планираното. Првите единици на овој автомобил ќе бидат испорачани во Европа во првиот квартал од следната година, 2022 година.
Се чини дека Kia нема да може да ги исполни поставените квоти на глобално ниво за оваа година. Корејскиот бренд на презентацијата на EV6 ја посочи целта за испорака на околу 100.000 возила во 2021 година, што сега се чини како недостижна бројка поради проблеми со набавката на полупроводници и микрочипови.