![Peugeot 308 се стекна со титулата „Автомобил на годината во Македонија 2023“](https://dodajgas.mk/wp-content/uploads/2023/03/Peugeot-308-COTYM-2023-1.jpg)
Peugeot 308 се стекна со титулата „Автомобил на годината во Македонија 2023“
Националното стручно жири за избор на „Автомобил на годината во Македонија“ по 28. пат го избра победникот на најпрестижната и најпосакуваната награда и признанието во автомобилската индустрија
Покрај наградата „Автомобил на годината во Македонија“, Националното Жири додели уште две признанија – SUV на годината и EV на годината (електрично возило на годината).
Од моделите пристигнати на македонскиот пазар помеѓу двата избора, Националното жири за избор на „Автомобил на годината во Македонија“ согласно Правилникот за работа и критериумите на изборот, одреди седум (7) финалисти: Alfa Romeo Tonale, Citroen C5 X, Kia Sportage, Opel Astra, Peugeot 308, Skoda Fabia и Toyota bZ4X.
Како што појаснуваат од жирито, финалистите се оценувале според следниве шест критериуми: адекватност и понуда на домашниот пазар, економичност и еколошка прифатливост, безбедност и примена на технолошки достигнувања, возни својства, дизајн и комфор и опременост.
Секој од членовите на жирито има право на еден глас. Право на еден рамноправен глас имаат и самите финалисти, кои можеле да гласаат за еден кандидат, освен за сопствениот модел.
Така, согласно критериумите за Избор, членовите на Националното жири за избор на Автомобил на годината во Македонија 2023, донесоа одлука титулата да му ја додели на моделот Peugeot 308.
Во образложението на Жирито за победникот се вели:
„Третата генерација на Peugeot 308 прави значаен технолошки исчекор во класата. Уникатен според својот стил, со мулти-енергетски можности и две каросериски изведби тој успева да ги сублимира класичните вредности од минатото, рационалноста на актуелната технологија и иднина со максимален респект кон природата. Изграден врз најновата надградба на EMP2-платформата тој може да понесе бензински и дизел мотори, потоа електрификација во вид на капацитетен plug-in хибрид, како и целосно електрична верзија“
Ова е првпат моделот Peugeot 308 да ја добие наградата во Македонија во досегашните 27 избори, и воопшто прва награда за францускиот бренд.
Признанието „СУВ на годината“ го доби моделот Kia Sportage, додека за „Електричен автомобил на годината“ е избран моделот Fiat 500e.
„Во специфични услови за сите нас кога и во автомобилската индустрија во тек е голема револуција и напредок, го заокружуваме овој 28-ти Национален „Избор на Автомобил на годината во Македонија“. Горди сме што единствената и најстарата манифестацијата од ваков вид во Македонија останува препознатлива и ја продолжува традицијата почната од 1995 година. Возилата постојано се подобруваат, индустријата оди напред, но купувачите секогаш остануваат подеднакво пребирливи. Верувам дека и во следниот период ќе придонесеме за препознавање и наградување на оние што навистина се најдобри“, вели Горан Антевски, претседателот на Националното Жири за избор на „Автомобил на годината во Македонија“.
Досегашни победници во изборот за „Автомобил на годината во Македонија“:
- 1996 Fiat Bravo/Brava
- 1997 Renault Megane
- 1998 Opel Astra
- 1999 Skoda Octavia
- 2000 Fiat Punto
- 2001 Seat Leon
- 2002 Toyota Corolla
- 2003 Mazda 6
- 2004 Mazda 3
- 2005 Seat Altea
- 2006 Vоlkswagen Passat
- 2007 Opel Corsa
- 2008 Kia Cee`d
- 2009 Volksvagen Golf VI
- 2010 Opel Astra IV
- 2011 Hyundai iX35
- 2012 Кia Rio
- 2013 Seat Leon
- 2014 Skoda Octavia
- 2015 Ford Mondeo
- 2016 Skoda Superb
- 2017 Kia Sportage
- 2018 Dacia Duster
- 2019 Ford Focus
- 2020 Opel Corsa
- 2021 Citroen C4
- 2022 Hyundai Tucson