Нема доволно ресурси: Toyota објаснува зошто не е добро да се инсистира само на електрични автомобили!
Со распоредување на достапниот литиум на што е можно повеќе возила, емисиите може да се намалат поефикасно
На Светскиот економски форум во Давос, една презентација во голема мера остана незабележана, но е исклучително важна бидејќи зад неа стои главниот научник на Toyota, најголемиот светски производител на автомобили. Д-р. Гил Прат им се обрати на присутните за да објасни зошто потпирањето само на електричните автомобили не е најдобриот стратешки пат.
„Јазот меѓу побарувачката на литиум и очекуваната понуда до 2040 година е голем. Меѓународната агенција за енергија всушност проценува дека разликата е дури 50 проценти. Не спијам навечер затоа што се прашувам како ќе стигнеме таму? Нема да има доволно литиум, бидејќи на рудниците им требаат 10-15 години, слушнав 16 години, за да почнат да работат. Потребни се две години за фабриките за батерии да започнат со производство, па ќе има голем недостиг од снабдување. Нашата теза, а Toyota не е сама во ова, е дека треба што повеќе да ги електрифицираме возилата, но не мора да ги електрифицираме само на еден начин. Методот со кој најмногу сте запознаени е возило што се приклучува и потоа вози исклучиво на батерии, но тие користат многу литиум. Вториот е plug-in хибридно електрично возило, кое има бензински мотор за полнење на батериите. И конечно, има хибриди кои се со постара технологија, кои користат бензин, но со многу поголема ефикасност. Сите користат литиум, но во различни количини.
Тезата на Прат е дека концентрацијата на употребата на литиум во мал број целосно електрични возила не ги намалува доволно просечните емисии на возниот парк во одредени држави. Со распоредување на достапниот литиум на што е можно повеќе возила, електрични автомобили и хибриди кои користат мали батерии, емисиите може да се намалат поефикасно, смета Прат.
„Значи, дури и ако индивидуалните перформанси не се толку добри, севкупните перформанси, имајќи предвид дека литиумот е клучен ресурс, всушност се далеку подобри. Да бидеме јасни, не предлагаме сите целосно да се префрлат на хибридни автомобили. До 2030 година, Toyota ќе произведува 3,5 милиони електрични автомобили на батерии годишно. Но, мислиме дека во одредени делови од светот – каде што инфраструктурата за полнење не е толку зелена, каде што има луѓе кои немаат лесен пристап до полначи – некои од овие други опции всушност може да бидат подобри. Значи, ајде да користиме литиум таму каде што прави најмногу добро“.
Неодамна Toyota беше критикувана дека доцни со преминот кон електрични возила…