Уникатниот Rolls-Royce Wraith ‘Inspired By Earth’ е вистинска уметност
Во изработката на уникатниот дизајн се потрошени над 100 часа работа
Одделот за специјални нарачки на Rolls-Royce отсекогаш бил познат по своите уникатни дела во однос на деталите и секој автомобил од луксузната марка што поминал низ рацете на специјалистите станува вистинско ремек-дело. Најновото дело е Rolls-Royce Wraith „Inspired by Earth“.
Дизајниран за клиент од Обединетите Арапски Емирати, моделот, инспириран од планетата Земја, всушност го претставува местото на Земјата во Сончевиот систем и како се гледа од вселената. Фокусот, логично, е сликата на Арапскиот полуостров, гледана од небото, рачно насликана преку целиот преден капак.
Телото на автомобилот е во сина боја, што ја симболизира водата – елементот што покрива 3/4 од нашата планета. Уникатната за брендот елегантна линија на телото е во специјална зелена боја, што ја симболизира природата како целина.
Арапскиот полуостров е насликан и на централната конзола, а бојата на специјалните кожни седишта го симболизира песокот од пустините на Блискиот исток. На седиштата има и темно сини акценти, кои ги симболизираат реките и езерата, а деталите во бело ги симболизираат облаците. Соларниот систем е прикажан на неколку други места во салонот, како што се праговите на вратите и централната конзола.