Илон Маск откри што мисли за Volkswagen
Првиот човек на Tesla го коментираше бизнисот на Volkswagen.
Спротивно на очекувањата, тој е полн со пофалби за Volkswagen. Покрај тоа што добро се согласува со првиот човек на Volkswagen Херберт Дис, тој исто така се согласува дека Volkswagen оди во вистинската насока. Во интервју за Financial Times, Маск вели дека Volkswagen, заедно со Tesla, постигнале најголем напредок во електрификацијата.
Запрашан кој стартап за електрични возила најмногу го импресионирал, Маск изненадува со одговорот. Наместо да спомене некои од ривалите како Nio или Lucid, тој вели:
„Мислам дека компанијата со најголем напредок покрај Tesla всушност е Volkswagen, кој не е стартап, но на полето на електрични возила можеме да го доживееме како стартап“.
Тоа е продолжение на пријателската приказна на двајцата шефови кои веќе имаа можност да зборуваат за електрификацијата, но и да ги испробаат конкурентските автомобили. На крајот на краиштата, откако Дис во неколку наврати ги пофали Tesla и Маск, овој гест е донекаде очекуван.
Маск се осврнува и на кинеските производители, кои особено ги фали.
„Мислам дека од Кина ќе дојдат некои силни компании. Има многу суперталентирани и вредни луѓе кои веруваат во производството. Тие се подготвени да останат во фабриката преку ноќ, додека во Америка луѓето се обидуваат да избегнат да дојдат на работа“, вели Маск.
Маск не сака да ги именува кинеските компании, но со оглед на тоа што Tesla има фабрика во Шангај, сосема е јасно дека има увид во кинеската работна етика, но и ентузијазмот кога е во прашање развојот на пазарот на електрични автомобили.