Се очекува ублажување на футуристичките елементи кај производствениот модел кој ќе се приклучи на растечкиот сегмент на електрични теренци

На тековниот Салон за автомобили во Лос Анџелес, Hyundai го претстави својот концепт SEVEN, кој е преглед на идниот сериски теренец со средна големина Ioniq 7. Постојат две клучни работи за кои се залага концептот SEVEN – електрична мобилност и футуристички стил со дневна соба – како внатрешност.

„Концептот SEVEN ја демонстрира креативната визија и напредниот технолошки развој на Hyundai за нашата иднина на електрифицирана мобилност. Неговиот иновативен ентериер, еколошки погон и најсовремените технологии за безбедност и удобност откриваат возбудлива иднина за клиентите на возилата на Hyundai“, вели Хозе Муњоз, претседател и извршен директор на Hyundai Северна Америка.

Концептот ја користи електричната-глобална модуларна платформа (E-GMP) на Hyundai, а компанијата цели на автономија од повеќе од 483 километри и полнење од 350 kW, што би требало да и обезбеди 80% од батеријата за само дваесет минути.

Сепак, она што е особено интересно е внатрешноста. Тркалата се турнати што подалеку, нудејќи меѓуоскино растојание од 3,2 метри и многу внатрешен простор за удобност. Во корист на ова, традиционалните редови на седишта се отфрлени за да можете да седите на ротирачки седишта или на кауч. Конзолата „Universal Island“ е дизајнирана да содржи работи како мини фрижидер и преграда за чевли. Наместо покрив, Hyundai се одлучил за панорамски OLED екран кој прикажува разновидна содржина и може да ја промени атмосферата во внатрешноста.

Возачкото седиште, за кое веќе кажавме дека е ротационо, може да се повлече кога не се користи, односно кога сте паркирани, бидејќи концептот SEVEN е замислен како автономен автомобил. За вистински да се создаде атмосфера во дневната соба, потенкиот и покомпактен кокпит содржи мноштво екрани, а вратите доаѓаат без столбови, нудејќи одличен пристап до кабината или „собата“.

Завршницата е со еколошки материјали како био-боја на надворешноста. Во внатрешноста се користени минерален малтер, бамбусово дрво, теписи и био-смола, додека речиси сè друго е направено од рециклирани или обновливи материјали. Поради своите антибактериски својства, Hyundai користел и бакар во ткаенината, а меѓу опциите е и хигиенски систем за проток на воздух со отвори зад задните тркала.

Препознатливите Parametric Pixel светла, со добредојдена секвенца при стартување. Сепак, ова е само концепт, додека за серискиот Ioniq 7 ќе треба да почекаме до 2024 година. Се очекува ублажување на футуристичките елементи кај производствениот модел кој ќе се приклучи на растечкиот сегмент на електрични теренци, како што е iX на BMW.