• Пребарај
  • Мени

Листа на категории

Вести
Видео
Новитети
Совети
Спорт
Технологија
Хамилтон како Фанџо – петта F1 титула за Британецот!
29/10/2018 Спорт

Хамилтон како Фанџо – петта F1 титула за Британецот!

Возачот на Mercedes, Луис Хамилтон, во трката за ГН на Мексико заврши на четвртото место, што беше доволно да ја завери новата шампионска титула

Победник во Мексико Сити беше холандскиот ас Макс Ферстапен, возачот на Red Bull, кој уште на стартот го претекна клубскиот колега Рикардо за потоа водечката позиција да ја задржи до крајот на трката и со тоа да ја оствари својата петта победа во кариерата.

Втор беше Себастијан Фетел, поранешниот шампион во Formula 1, кој на крајот не изгледаше премногу задоволен и покрај одличното второ место. Подиумот го заокружи Кими Раиконен кој трката ја заврши на третата позиција пред Хамилтон и Валтери Ботас.

Во првите десет и бодови завршија и Хулкенберг, Леклер, Вандорн, Ериксон и Гаскоњ.

Хамилтон ја освои својата петта титула во Formula 1 и стана само петтиот возач на кого тоа му пошло од рака во историјата на ова натпреварување.

Трката во Мексико не ја завршија Алонсо, Саинц, Перес и освојувачот на пол позицијата Рикардо. Првите тројца се откажаа уште во почетните кругови на трката, за разлика од Рикардо кој без пласман остана некаде кон крајот на трката. Австралиецот возеше добро, се бореше за второто место со Фетел, но за жал мораше да се откаже, по осми пат, најмногу од сите оваа сезона, поради проблеми со моторот.

На Хамилтон за заверка на титулата му беше потребно да заврши најмалку на седмото место и се чини и не вложи премногу напор за да стигне до пласман на пиедесталот, иако во текот на целата трка имаше проблем со ултра-меките гуми.

Показател за недостатокот на интерес кај Хамилтон беше и лесното предавање на позиција во борбата со Кими Раиконен и Себастијан Фетел, на кои практично им дозволи да го поминат без борба.

Со новата петта по ред титула, Британецот на вечната листа се изедначи со Хуан Мануел Фанџо, а рекордер сеуште е легендарниот Михаел Шумахер со седум.

Нешто што мора да се спомене за оваа трка е разликата помеѓу првите три екипи и остатокот од караванот. Хулкенберг, кој на крајот од трката заврши на 6. место, заостануваше два круга зад водечките, а возачите на „опашката“ заостануваа дури три круга. Оваа разлика мора да ги загрижи водечките луѓе во Formula 1, бидејќи ако наскоро нешто не се промени, помалите тимови нема да имаат мотивација да се борат во овој шампионат.

Иако Хамилтон успеа да ја обезбеди шампионската титула кај возачите, шампионатот во категоријата конструктори се уште е отворен. До крајот на сезоната остануваат уште две трки, а Ferrari е во налет. Ако продолжи така, можеби и би можел да го надокнади бодовниот дефицит во однос на Mercedes (-55) и по 10 години ја освои титулата кај конструкторите.

2018 Mexican Grand Prix: Резултати

2018 Mexican Grand Prix: Race Highlights

2018 Mexican Grand Prix: Изјави по трката

Луис Хамилтон

Макс Ферстапен

Себастијан Фетел

Даниел Рикардо

2018 Formula 2: Генерален пласман / ВОЗАЧИ

Следната трка во шампионатот во Formula 1 се вози за две недели во Бразил.