Футуристичкиот Mercedes-Benz Vision EQXX станува сериски модел?!
Неговите технологии ќе се користат во идните електрични автомобили на марката
Концептниот прототип Mercedes-Benz Vision EQXX, кој дебитираше во јануари 2022 година, беше дизајниран за да го покаже потенцијалот на Daimler во сегментот на аеродинамиката, технологијата на батерии и композитните материјали. На премиерата компанијата објави дека скоро и да нема шанси за моделот, но сега е јасно дека тој сепак може да влезе во сериско производство. Или барем делумно, пренесува Move Electric.
Концепт автомобилот е развиен за само 18 месеци, што според индустриските стандарди е речиси момент. Засега не е сосема јасно каква ќе биде судбината на Vision EQXX, но портпаролот на марката вели дека некои од поединечните решенија ќе најдат место во идните сериски автомобили на производителот од Штутгарт.
Овде не станува збор само за специфични компоненти и технологии, туку и за софтверот и дигиталните алатки кои се користеле во развојот на автомобилот, како и воопшто за пристапот кон создавање на нови модели на Mercedes-Benz.
Меѓутоа, во исто време, извршниот директор на Mercedes-Benz, Маркус Шефер и главниот дизајнер на брендот Гордон Вагенер, навестија дека со некои промени и во технологијата и во дизајнот, концептниот автомобил Mercedes-Benz Vision EQXX ќе стане сериски електричен автомобил.
Премиерата на овој модел може да се очекува да се случи во 2024 година.