![Дали ќе се случи голем пресвт? Привремено стопирана одлуката за забрана на возила на бензин и дизел во ЕУ?!](https://dodajgas.mk/wp-content/uploads/2023/03/auto-stop-2035.webp)
Дали ќе се случи голем пресвт? Привремено стопирана одлуката за забрана на возила на бензин и дизел во ЕУ?!
Земјите-членки на ЕУ денес одлучија да ја одложат конечната одлука за воведување забрана за продажба на нови возила со мотори со внатрешно согорување по 2035 година
Конечната одлука требаше да ја донесат министрите за животна средина кои ќе се сретнат следната недела, поточно на 7 март, за сепак замениците шефови на постојаните претставништва на земјите членки (Coreper I) одлучат да ја одложат за следниот состанок на Советот, објави портпаролот на шведското претседателство со Советот на ЕУ, Даниел Холмберг, без да ги наведе причините за одложувањето.
Преговарачите на Советот на ЕУ, кој ги претставува земјите членки и Европскиот парламент, на крајот на октомври минатата година постигнаа начелен договор за регулатива со која се предвидува задолжителна примена на стапката на нулта емисија за нови автомобили и ванови од 2035 година, што значи дека оттогаш повеќе не може да се продаваат нови автомобили на бензин и дизел односно мотори со внатрешно согорување.
Потоа, договорот беше потврден од Европскиот парламент на пленарната седница на 14 февруари, а остана конечната одлука на Советот за регулативата да стапи во сила.
Меѓутоа, во последно време почнаа да се слушаат критички гласови, особено во Германија и Италија, две земји-членки со многу силни автомобилски индустрии, дека предвидениот рок е премногу амбициозен и предвремен.
„Потребни ни се е-горива бидејќи нема алтернатива ако сакаме да управуваме со нашиот возен парк на климатски неутрален начин“, вели германскиот министер за транспорт Фолкер Висинг и објаснува: „Мораме да ги држиме отворени сите технолошки опции и исто така да ги користиме. Не ја разбирам оваа борба против автомобилите и зошто луѓето сакаат да забранат некои технологии“.
Заедно со Италија и Германија, резерви за оваа регулатива имаат и Полска и Унгарија. Доколку Германија биде воздржана, а Италија против, нема да има доволно гласови во Советот за квалификувано мнозинство. Одлука во Советот може да се донесе доколку за неа гласаат најмалку 15 од 27 земји-членки, кои имаат најмалку 65 отсто од населението на ЕУ.
Телата на ЕУ се надеваат дека сепак Германија ќе ја убедат да гласа за регулативата, особено ако добие цврсти гаранции дека синтетичките горива кои се климатски неутрални ќе бидат изземени.
Германската автомобилска индустрија вработува 800.000 луѓе и сочинува околу 5 отсто од германската економија. Ништо не е подобро ниту во другите земји. На пример, Stellantis веќе подели 2.000 отпуштања во Италија, а Fiat изгуби 7.000 работни места во последните три години. Ford најави намалување за 11 отсто на својата работна сила во Европа, а најголем дел од отпуштањата се однесуваат на Германија и Велика Британија.
За потсетување, убедливо мнозинство немаше ниту во Европскиот парламент. За одлуката гласаа 340 пратеници, против беа 279, а воздржани 21 пратеник. Регулативата ја поддржаа претставници на социјалдемократите, зелените и либералите.