Американците се изјаснија: Еве кои автомобили според нив имаат најдобра технологија
Во рангирањето најмногу доминираат премиум брендовите. Прв е Genesis, по кој следа Cadillac, Mercedes-Benz, Hyundai…
Високите технологии веќе долго време се еден од најважните фактори кои ги тераат луѓето да избираат одредени автомобили, а производителите се повеќе се обидуваат да ги опремат автомобилите со се повеќе такви технологии и да им овозможат на клиентите искуство слично како кога го користат својот паметен телефон.
Овогодинешното истражување на Ј.D. Power насловено како 2022 Tech Experience Index (TXI) открива колку се задоволни корисниците со такви, но и многу поедноставни технологии, како што е предупредувањето за ременот на задното седиште во нивните автомобили. Очекувано, клиентите се најмалку задоволни од комплицираните технологии кои не функционираат совршено, така што повеќе од 50 проценти од нив, на пример, се пожалиле на функциите за препознавање отпечаток од прст што ги нудат одредени производители во нивните модели.
Истражувањето покажало и дека продавачите можат да играат голема улога во задоволството на клиентите, односно начинот на кој им објаснуваат на клиентите како функционира една технологија и за што може да се користи.
Најдобра оценка во истражувањето спроведено за американскиот пазар постигнал Genesis, луксузниот бренд на Hyundai, а меѓу „масовните производители“ првото место го зазема Hyundai, што е огромен успех за корејскиот производител. Уште подобар резултат од нив постигнала Tesla, но овој бренд е исклучен од официјалните резултати бидејќи не сака да споделува податоци за возилата и клиентите со J.D. Power.
Во рангирањето најмногу доминираат премиум брендовите. Прв е Genesis, по кој следа Cadillac, Mercedes-Benz, Hyundai, Volvo, BMW, Land Rover, Kia, Infinity и Lexus.
На дното на рангирањето се Ford, Porsche, Chrysler, Honda и најслабо пласираната Mazda. Во рангирањето на премиум производителите, на дното се Lincoln, Acura, Audi, Alfa Romeo и Porsche, што значи дека еден од најпрестижните производители во светот ја добил најлошата оценка од своите клиенти.
Топ 10 масовни (не премиум) производители се Hyundai, Kia, Buick, GMC, Subaru, Ram, Chevrolet, Nissan, Toyota и Dodge, што покажува дека Американците се најзадоволни од корејските, домашните и јапонските брендови.
Во истражувањето, клиентите оцениле вкупно 35 технологии на автомобили, кои биле поделени во четири категории: удобност, технологии за автоматизација, енергија и одржливост и инфо-забававен систем и поврзување. Во истражувањето учествувале дури 84.165 сопственици на нови автомобили кои истите во сопственост ги имале најмалку 90 дена.