ЕУ: Може ли автомобилите на бензин и дизел сепак да преживеат?!
Како потсетување, Европската унија ќе ја забрани продажбата на сите нови бензински (и хибриди) и дизел мотори од 2035 година. Сепак, оставена е една преодна точка бидејќи за оваа одлука повторно ќе се расправа во 2026 година. Дали Европската унија избрза во својата одлука?
Мотивот е да се заштити климата, но цената што ќе ја плати економијата на ЕУ е превисока, особено земјите со моќна автомобилска индустрија како Германија, Франција, Италија…? Комесарот за внатрешен пазар на Европската комисија Тиери Бретон во интервју за Politico го вклучи алармот.
Бретон предупредува дека префрлањето на чиста електрична мобилност ќе збрише повеќе од 600.000 работни места. Веќе во 2030 година, многу пред планираната забрана, за електричните автомобили ќе бидат потребни 15 пати повеќе литиум, четири пати повеќе кобалт и графит и три пати повеќе никел – што е огромна потрошувачка на суровини, тврди Французинот. Од друга страна, Европа има некои рудници, но најголем дел од суровините ќе мора да ги увезува. Исто така, ќе биде потребна 20 до 25 отсто повеќе електрична енергија, но нејзиното производство со гас или јаглен нема смисла од перспектива на борбата против климатските промени.
Дури и ако електричната енергија се произведува чисто, електричните автомобили сè уште придонесуваат за загадување – поради зголемените емисии на честички од гумите и сопирачките, вели Бретон. Електричните автомобили често се многу потешки од возилата со конвенционален погон. Електричниот Mercedes-Benz EQA, SUV базиран на компактната GLA, е потежок од големата S-класа. Бретон укажува и на сериозни недостатоци во проширувањето на инфраструктурата за полнење. Седум милиони станици за полнење би биле потребни за сериозна електрична мобилност во Европа, а моментално има вкупно 350.000. Седумдесет проценти од нив се наоѓаат во само три земји, Франција, Германија и Холандија.
Затоа, постепеното укинување на моторите со внатрешно согорување не е добра идеја во моментов – бидејќи дури и да успее во Европа, бензинските и дизел моторите сепак ќе се продаваат на другите континенти.
„Препорачувам европските компании да продолжат со производство на мотори со внатрешно согорување“, вели Бретон.
Што се однесува до Европа, еврокомесарот за внатрешниот пазар на ЕУ сака во следните неколку недели да постави строги критериуми според кои може да се мери напредокот. Транзицијата кон е-мобилност има толку многу импликации за индустријата што ЕУ не може да си дозволи да пропадне. Доколку Комисијата утврди дека оваа линија е промашена, датумот за излез мора да се одложи – и тоа без табуа.
Комесарот не споменува, но Кина претставува огромна конкуренција со електричните автомобили, кои технолошки се еднакви со европската конкуренција, а се значително поевтини.