Намерата на рускиот политички врв е да и овозможи на домашната економија пристап до евтини електронски компоненти од домашно потекло, кои според карактеристиките би ја надминале странската конкуренција

За ова на Меѓународниот економски форум во Санкт Петербург зборуваше вицепремиерот на Руската Федерација, Дмитриј Чернишенко, образложувајќи ги плановите според кои се сака да се пристапи кон развој на критични електронски компоненти за потребите на домашната автомобилска индустрија. Сепак, еден дел од потребниот контингент на микропроцесори ќе продолжи да се увезува од земји кои негуваат добронамерни чувства кон најголемата земја на глобално ниво.

 Чернишенко зборува и за фактот дека тамошните инженери веќе се ангажирани во развојот на електронски компоненти кои веќе две години ги мачат службите за набавка и производство на сите големи светски производители. Тој вели дека Русија ја има сета потребна технологија за да се справи со оваа задача. Високиот функционер на оваа земја вели и дека главна задача сега е проширување на производните капацитети, како и формирање на критично важни компоненти за заедничка конструкција за која веќе е воспоставена потребната инфраструктура во Русија.

Рускиот вицепремиер вели дека државата ќе се обиде да постигне „разумна рамнотежа помеѓу технолошката изолација, која обично води до деградација на технологијата, и интеграцијата во глобалните синџири на снабдување, под услов клучните технологии да останат во земјата“. Покрај тоа, Чернишенко верува дека руската електроника во иднина би можела да ја надмине онаа што ја изведуваат колегите од другите земји.

Во април минатата година, Министерството за економија и трговија на Руската Федерација објави дека ќе им понуди финансиска поддршка на производителите на автомобили, доколку одлучат да се откажат од електронските компоненти произведени од странци и да ги користат оние од домашно потекло. За тие цели е издвоена сума од четири милиони руски рубљи или преведено нешто помалку од 66,3 милиони евра.