Opel го зголеми опсегот на електричните верзии на Corsa и Mokka
EV дуото на Opel од сегментот Б доби поголема автономија на движење
Сосема очекувано и логично, бидејќи Peugeot неодамна го направи истото. Истите промени се применети и на електричните возила од сестринскиот Opel.
Како се дошло до повеќе опсег со едно полнење? За почеток, преку промени поврзани со менувачот или неговата оптимизација, некои пакети на опрема ќе добијат и гуми со низок отпор на тркалање, а дополнително ќе биде имплементиран нов сензор за влажност во кабината, при што Opel наведува дека ќе го ажурира софтверот за контрола на греењето во патничкиот простор.
Што значи ова во пракса? Германците посочуваат околу 7% поголема автономија на движење… Така, Corsa сега може да смета на опсег од 359 km, во споредба со некогашните 337 km, што е зголемување за 22 km.
Од друга страна, досегот на електричната Mokka е зголемен за 14 km. Секако, зголемувањето е помало отколку кај хечбекот, пред се поради послабите аеродинамички својства на Mokka, но и поради поголемата тежина на овој теренец во однос на Corsa. Кросоверот со батерии сега може да помине 338 километри според протоколот WLTP, додека пред овие промени имаше автономија од 324 километри.
