Норвешка е „друг свет“: во јануари продадени повеќе Porsche Taycan од вкупно бензински модели!
Меѓу 20-те најпродавани автомобили продадени во Норвешка во јануари, само еден автомобил не бил електричен – Toyota RAV4
Во годината на рекорди (2021) за Porsche со испорачани повеќе од 300.000 автомобили, електричниот Taycan успеа да го надмине 911 и да се искачи на првото место. Се чини дека Taycan сигнализира „ветер на промени“, кој во Европа потекнува од нордиските земји каде електричните возила се исклучително популарни веќе неколку години. Првиот EV модел од Цуфенхаузен во јануари оваа година во Норвешка се продавал повеќе од сите бензински модели заедно.
Податоците објавени од Норвешката федерација за патишта (OFV) покажуваат дека во јануари биле купени вкупно 7.957 возила, од кои само 387 биле на бензински или дизел погон без никаква хибридна помош. Помалку од половина (175) биле чисти бензинци, а за споредба, Taycan го нашол патот до 181 клиенти.
Меѓу 20-те најпродавани автомобили во Норвешка во јануари, само еден автомобил не бил електричен – Toyota RAV4. На самиот врв на листата е Audi Q4 E-Tron со 643 продадени примероци, следен од Hyundai Ioniq 5 со 477 и BMW iX со 444 примероци. Топ 5 го комплетираат Škoda Enyaq со 389 продадени единици, исто колку и сестринскиот модел VW ID.4.
Се разбира, реалниот број на продадени автомобили е далеку од импресивен. Но не треба да се заборави дека Норвешка има само околу 5,4 милиони жители, а во јануари продажбата на нови патнички автомобили паднала за 22,8 отсто во споредба со истиот месец во 2021 година. Некогашниот лидер Volkswagen Golf не е ниту во Топ 20, а духовниот наследник на e-Golf – ID.3 е на последното место со 125 единици.