Hyundai Ioniq 6 доаѓа со рекордно ефикасни батерии / ФОТО
Новиот електричен модел на Корејците ќе биде достапен со еден или два мотори
Во 2020 година, Hyundai го покажа концептот Prophecy, електричен седан чие тело во облик на капка беше дизајнирано да создава најефикасна можна аеродинамика. Две години подоцна, Корејците се готови и со сериската верзија на моделот. Неговото име е Hyundai Ioniq 6, а во Европа доаѓа на почетокот од 2023 година.
Ефикасноста е она што ги водело не само инженерите, туку и сите кои работеле на проектот наречен Ioniq 6. Крајниот резултат е купе со 4 врати кое може да помине 610 километри со едно полнење на батеријата по WLTP, нудејќи рекордно ниска потрошувачка на енергија во оваа категорија.
За напојување на моторот или моторите (во зависност од избраната конфигурација) кај најмоќниот Hyundai Ioniq 6 одговорна е батерија со капацитет од 77,4 kWh – истата е инсталирана и во Ioniq 5. Основата на моделот е E-GMP платформа, која ја користат електричните автомобили на корејската групација, што значи вклучително и модели на Kia и Genesis.
Батериите имаат подобрена способност да испорачуваат и примаат струја, а со цел намалување на потрошувачката на помалку од 14 kWh на 100 km. Овој индикатор е за послабата верзија на Ioniq 6, која се добива со батерија со капацитет од 53 kWh. Има еден електричен мотор и погон на задната оска.
Топ варијантата има два електромотори – по еден на секоја оска и батерија од 77,4 kWh. Моќноста е 325 КС. и 605 Nm, а забрзувањето од 0 до 100 km/h трае 5,1 секунди. Ова нема да биде најмоќната модификација, бидејќи Hyundai го подготвува Ioniq 6 N, развиен од спортскиот оддел на концернот. Неговите мотори се очекува да развиваат над 585 КС.
Новото купе со четири врати има и технологија за полнење со 800 V, што овозможува поврзување со мрежи со моќност до 350 kW. Со нив батеријата за 18 минути се полни од 10 до 80% од капацитетот, а со користење на функцијата Vehicle to Load, можете да полните надворешни уреди како паметни телефони, електрични скутери или друго.
Внатрешноста на Hyundai Ioniq 6 до одреден степен ја повторува онаа на Ioniq 5, но додаден е нов централен тунел дизајниран специјално за поддршка на лаптоп. Тука е и специјалното амбиентално осветлување кое го менува интензитетот и боите во зависност од различните достапни режими на возење. Тие го вклучуваат и ажурираниот EV Performance Tune-up, благодарение на кој е можно слободно да се приспособат различни параметри како што се управување и одговор на моторот, чувствителност на гас, влечење (на верзијата со два мотори) и многу повеќе.
Електричниот автомобил има и бројни системи за помош на возачот, како што е Highway Driving Assist 2, каде што прилагодливиот темпомат и системот за задржување во лента работат заедно за автоматско одржување на брзината, растојанието од возилата напред и траекторијата. Стандардниот Hyundai Ioniq 6 е опремен и со систем за помош при возење од ниво 2, кој вклучува автоматска функција за свиоци.
