Европа засега не ги намалува количините: Расте увозот на руска нафта!
Потсетување дека Европската унија донесе ембарго на 90 отсто од увозот на нафта од Русија до крајот на годината
Европската унија планира да го забрани најголемиот дел од увозот на нафта од Русија до крајот на годинава, но во моментов нема намалување на увозот на пазарот. Сосема спротивно, европските рафинерии купија големи количини руска сурова нафта минатата недела, според податоците за следење на танкери собрани од Bloomberg.
Минатата недела европските рафинерии земале 1,84 милиони барели руска сурова нафта дневно – што е константен пораст на неделна основа. Увозот на нафта од Русија во Европа, вклучително и Турција, сега е најголем во речиси два месеци.
Зголемувањата се главно резултат на купувањето на руската компанија Litasco SA, трговско друштво на Лукоил, и Турција. Лукоил има три рафинерии во Европа, Италија, Романија и Бугарија и продолжува да го засилува купувањето на руска сурова нафта. Иако остатокот од Европа веројатно нема да го зголеми увозот на руска сурова нафта, бројките остануваат стабилни, покажува анализата на Bloomberg.
ЕУ се согласи да воведе ембарго на 90% од увозот на нафта од Русија до крајот на годината, но можеби најважниот аспект од обидот на Европската унија да ја ослаби Русија економски доаѓа во форма на забрани за транспортно осигурување. На компаниите од ЕУ нема да им биде дозволено да го осигуруваат или финансираат поморскиот транспорт на руска сурова нафта во други земји. Тоа би ја намалило способноста на Русија да извезува сурова нафта во светот, велат аналитичарите.
Русија, сепак, вели дека ќе обезбеди државна гаранција во согласност со трговскиот договор на Русија со други земји, изолирајќи се од какви било забрани што ЕУ и Обединетото Кралство би можеле да ги спроведат. Повеќето пристаништа во светот не дозволуваат приклучување на танкери кои немаат целосно осигурување.
Во меѓувреме, Русија продолжува да испорачува големи количества руска сурова нафта за Кина и Индија.