BMW подготвува 9 нови електрични модели
Планот на компанијата предвидува лидерска позиција во сегментот до 2030 година
BMW ги претстави плановите за електрифицирање на својата гама на модели, што предвидува лансирање на 9 нови модели со нулта емисија на штетни гасови до 2030 година, пренесува Autocar.
Според планот Power of Choice, BMW во следните 10 години треба да продаде повеќе од 7 милиони хибридни и целосно електрични модели, вклучително и возила од марката MINI. Баварците си поставија цел во 2030 година да станат лидер во сегментот на електрични автомобили, во кој се натпреваруваат со Audi, Jaguar, Lexus, Mercedes-Benz и Tesla.
За да се постигне таков резултат, компанијата ќе мора да продава 460.000 „зелени“ автомобили годишно. Ова е повеќе од 10 пати од резултатот за 2019 година, кога BMW успеа да продаде само 42.249 електрични автомобили, сите се i3. Ова е единствениот сериски модел на струја во гамата на германскиот производител во моментот.
Меѓу новите целосно електрични модели до крајот на годината ќе биде и верзијата на X3 под името iX3, а во 2021 година ќе и се придружат купето i4 и сериската верзија на концептот iNext, која ќе го носи името iX. Покрај тоа, Баварците подготвуваат мал кросовер базиран на X1 – iX1, нови електрични i5 и i7, како и верзија на сегашната Серија 3, која ќе го замени хечбекот i3.
Според Autocar, брендот Mini кој е во сопственост на BMW ќе понуди две електрични возила кои ќе се градат на сегашните платформи на компанијата – FAAR и CLAR.