Audi најавува нови електрични RS и RS SUV модели
Извршниот директор на Audi Sport ветува нови спортски модели
Во интервју за британскиот Autocar, Себастијан Грамс вели дека тимот разгледува „различни типови концепти“ кои би замениле суперавтомобил со среден мотор.
Наследникот на R8 мора да одговара на стратегијата за електрификација на Volkswagen Group, а истото може да се каже и за TT. Матичната компанија на Audi треба да даде зелено светло.
Грамс вели дека во иднина „дефинитивно“ ќе има повеќе теренци со ознака RS, без да навлегува во детали.
Извршниот директор на Audi Sport ветува и дополнителни електрични RS автомобили кои ќе го следат RS E-Tron GT. Идните модели без мотори со внатрешно согорување се дизајнирани без да додаваат премногу тежина со наоѓање совршена рамнотежа помеѓу моќноста и дополнителниот капацитет на батеријата. Покрај тоа, на пат се и plug-in хибридни спортски автомобили и тие „нема да бидат ништо помалку неверојатни од она што го возите денес“.
Не сите модели ќе добијат третман RS бидејќи германската марка сака да го избегне она што Себастијан Грамс го нарекува „RS инфлација“.
На прашањето дали посветеноста на компанијата кон Formula 1 од 2026 година со Sauber ќе го намали буџетот за истражување и развој за патни автомобили, шефот на Audi Sport одговара дека тоа нема да биде случај.
До 2030 година сите модели на Audi Sport до одреден степен ќе бидат електрифицирани, што значи дека деновите на автомобилите што користат само мотори со внатрешно согорување се одбројани. Во меѓувреме, компанијата веќе ја отфрли можноста за производство на 4-цилиндерски RS модели, за разлика од Mercedes-AMG со својата линија „45“.