Рекордно ниво на јаглерод диоксид во атмосферата
Концентрацијата е за 50 проценти поголема од прединдустриското ниво, и покрај падот на емисиите за време на пандемијата со COVID-19.
Присуството на јаглерод диоксид во атмосферата достигна рекордни нивоа, и покрај позитивните ефекти од мерките преземени за да се запре ширењето на вирусот, велат научниците.
Според последните мерења на станицата во опсерваторијата Мауна Лоа на Хаваи, глобалното ниво на јаглерод диоксид е за 50% поголемо во споредба со периодот пред почетокот на индустриската револуција во Велика Британија.
Податоците објавени од океанографскиот институт Скрипс на Универзитетот во Калифорнија, Сан Диего, покажуваат дека концентрацијата на стакленички гасови во март во просек изнесувала 417,14 ppm, што е ново највисоко забележано ниво.
Британската канцеларија за метеорологија предвидува дека месечната концентрација на јаглерод диоксид, главниот двигател на глобалното затоплување и климатската криза, ќе достигне врв од околу 419,5 ppm во 2021 година.
Претходниот рекорд на месечна основа измерен во Мауна Лои според податоците на Скрипс бил 417,10 ppm, измерен во мај 2020 година. Годишниот просек минатата година беше 413,94 ppm, а прогнозата за 2021 година беше околу 416,3 ppm.
Нивото на јаглерод диоксид во атмосферата во текот на годината варира незначително, опаѓајќи донекаде, бидејќи едниот дел се апсорбира од растенијата што растат на северната хемисфера во текот на пролетта и летото, за повторно да се зголеми во есен и зима.
Сепак, долгорочниот нагорен тренд на концентрација на јаглерод диоксид е предизвикан од човечка активност, главно преку согорување на фосилни горива и уништување на шумите, вели британскиот метеоролошки завод.
Глобалните емисии беа привремено намалени во 2020 година како резултат на намалените транспортни и економски активности, а резултат на пандемијата со коронавирус. Сепак, намалувањето на емисиите во текот на 2020 година не беше доволно за значително да влијае на зголемувањето на концентрацијата на СО2, која продолжува да расте. Ќе биде потребно многу подрастично намалување на емисиите на долг рок за да се забави или запре растот, предупредуваат Британците.
Проекциите на научното тело на Обединетите нации задолжени за климатските промени, Меѓувладиниот панел за климатски промени, предупредуваат дека е потребно да се запре глобалното затоплување на 1,5 степени Целзиусови, бидејќи после тоа се очекуваат најлошите ефекти од зголемувањето на температурите, што наметнува императив да се постигнат нула емисии. 2050 година или порано.
Постигнувањето на нула нето-емисии вклучува намалување што е можно поблиску до нула и преземање чекори како што се садење дрвја за да се апсорбира преостанатото загадување.
Коментирајќи ги најновите податоци, професорот Мартин Сигерт од Институтот Грантам на Царскиот колеџ во Лондон, вели дека постигнувањето нов рекорд е сосема очекувано.
„Емисијата е можеби редуцирана, но ние сепак испуштаме големи количини јаглерод диоксид, така што неговата атмосферска концентрација расте и ќе продолжи да расте се додека не достигнеме нето нула емисии. Нашиот пат до нејзиното реализирање е очигледен, предизвикувачки и неопходен и мора итно да ја започнеме оваа транзиција“, вели тој.
„Лесно е да се заборави до кој степен и колку брзо емисијата предизвикана од фосилни горива влијае на нашата планета. Потребни беа над 200 години да се зголеми количината на јаглерод диоксид во атмосферата за 25 проценти и само 30 години да се достигне концентрација од 50 проценти над прединдустриските нивоа. Оваа драматична промена е како човечки метеор да ја погодува Земјата. Меѓутоа, ако земјите денес формираат планови да ги стават своите општества на патот на одржливо и драматично намалување на емисиите, можеме да избегнеме зголемување на емисиите и опасни забрзани влијанија врз климатските промени “, додава професорот Симон Луис од Универзитетот во Лондон.