Повеќе од три четвртини од сите автомобили на патиштата ширум светот имаат бела, црна, сребрена или сива надворешност

Според податоците објавени од компанијата BASF, во 2019 година, овие 4 нијанси биле застапени на 78% од возилата на патиштата ширум светот.

Клиентите најмногу се определиле за белата боја (39%), а по неа следат црната (16%), сивата (13%) и сребрената боја (10%).

Одговор на прашањето зошто огромното мнозинство возачи се одлучуваат за монохроматски бои се обиделе да добијат и од телевизиската куќа CNBC.

Во игра се бројни фактори, вклучувајќи го и фактот дека белата, црната, сивата и сребрената боја „одат со сè“, како и дека се достапни за скоро секој модел на пазарот.

Овие нијанси, исто така, не излегуваат од мода, за разлика од некои „екстравагантни“ бои кои подоцна можат да го одвлечат вниманието на сопственикот при препродажба на возилото.

Покрај тоа, на одредени пазари, клиентите имаат тенденција да ги купуваат своите возила директно од изложбениот салон, каде што веќе се изложени, наместо да ги нарачуваат од фабрика во одредена боја и да чекаат некое време за испорака. Ова е погодно за клиентите, бидејќи тие можат веднаш да влезат во нивниот автомобил и да се одвезат каде сакаат, а дилерите обично одат на сигурно и нарачуваат единици во неутрални бои затоа што знаат дека ќе им биде полесно да ги продадат.

Важна улога игра и психологијата, а CNBC во својот извештај забележува дека сината боја е популарна кога станува збор за електрични возила.

Ова делумно се должи на производителите на автомобили кои кога електричните возила почнаа да стануваат популарни, честопати користеа одредена сина нијанса, па сега потрошувачите ја поврзуваат оваа боја со електричните возила.

Производителите на автомобили многу придонесуваат за фактот дека возилата со монохроматски надворешни бои најчесто се наоѓаат на патиштата. Повеќето од нив не наплатуваат дополнително за бела боја.

Исто така, благодарение на подобрувањата во технологијата, достапни се повеќе бели, црни и сиви опции.

Loading...