Огромната побарувачка и недостигот на чипови го направија своето: клиентите повеќе не се врзуваат за својата омилена марка на автомобили
Ново истражување покажува дека речиси половина од огромниот број клиенти се подготвени да го променат својот избор кога станува збор за автомобилски бренд
Како што продолжува континуираниот недостиг на нови и користени автомобили поради глобалниот недостиг на чипови, се чини дека лојалноста кон еден бренд е минато во автомобилската индустрија. Имено, недостигот на чипови им отежнува на производителите да составуваат нови автомобили, што пак доведува до зголемена побарувачка за користени модели.
Севкупно, недостиг има и на нови и на користени автомобили, но рекорден број возачи (41,2%) се уште се надеваат дека ќе купат автомобил следната година. Autovia, матичната компанија на Auto Express, спровела истражување на дури 2.445 клиенти, од кои 47,4% бараат алтернатива за нивниот првичен избор, оставајќи ги своите омилени производители. Само секој четврти од нив успеал да купи автомобил во последните шест месеци, додека 57% се подготвени да чекаат три месеци за омилената марка на автомобили.
Дури 32,8% од нив веќе се откажале од купување на нов модел и се одлучиле за користен автомобил. Неверојатни 86,8% од клиентите рекле дека нивните планови за купување биле одложени поради проблеми со снабдувањето и високите цени, 21,2% ги одложиле само поради високите цени, а 17,9% рекле дека моделот што го сакале не е моментално достапен. Помалку од седум проценти од купувачите, ја одложиле својата намера да купат нов автомобил на неодредено време.
Џон Веб, извршен директор на автомобилски податоци, кои вклучуваат информации за генерирање побарувачка и комерцијални операции во Autovia, истакнува дека „прекините во производството во последните две години го сменија вообичаениот модел што го гледаме во податоците за намерите за купување автомобили“.
„И покрај фрустрациите кои доведоа до тоа 72% од потенцијалните клиенти не успеале да го најдат вистинскиот автомобил по вистинска цена во изминатите шест месеци, половина од луѓето што ги анкетиравме сè уште се надеваат дека ќе најдат автомобил наскоро, а тој број се зголемува на 69% ако станува збор за период од шест месеци. Гледаме зголемување на побарувачката на пазарот, кој сè уште не може да се надева дека ќе го задоволи апетитот на потрошувачите, а многу познавачи предвидуваат дека проблемите со производството веројатно ќе продолжат и во втората половина на 2022 година“.
„Можеби најзначајното откритие во нашите податоци е дека речиси половина од огромниот број клиенти се подготвени да го променат својот избор на автомобил. Ова е црвено знаменце за лојалноста кон одреден бренд бидејќи возачите најверојатно ќе ја променат марката за да ја најдат споредливата големина и каросерискиот облик, пред се поради поприфатлива цена, од она што првично го барале“, додава Веб.