Новини од ЈП ПОЦ, но и поскап паркинг
Директорот на ЈП Паркинзи на Општина Центар, Васко Кичевски и градоначалникот на Општина Центар, Саша Богдановиќ на денешниот Божиќен појадок со медиумите ги претставија идните планови на претпријатието и ги презентираа капиталните инвестиции за 2020 година кои, како што велат тие, ќе донесат многу бенефити за жителите на општина Центар и за граѓаните на Македонија.
На Божиќниот појадок беше најавена новата мобилна апликација на ЈП Паркинзи на Општина Центар која е планирано да биде пуштена во употреба до крајот на месецот.
„Направивме надоградба на веќе постоечката апликација и сега граѓаните ќе можат електронски да ги користат сите наши услуги и преку самата апликација“, истакна Кичевски.
Новата мобилна апликација, исто така, ќе им овозможи на жителите на Општина Центар да ги пријавуваат сите комунални проблеми.
„Сега ќе имаме точна слика за секој еден проблем на територија на општина Центар. Знаете некогаш едноставни проблеми не се решени поради немање на навремена информација како прегорена сијалица, оштетена клупа, дупка на некоја од сервисните улици или некој сличен комунален проблем. На овој начин ќе можеме да бидеме во постојана комуникација со граѓаните кои ќе добиваат повратни информации за решениот проблем кој тие ни го имаат предочено, а ние ќе можеме побрзо да ги отстрануваме комуналните проблеми на жителите на Општина Центар“, рече градоначалникот Богдановиќ.
Следејќи ги светските трендови во паркинг индустријата, ЈП Паркинзи на Општина Центар ќе воведе и мрежен систем за автоматска наплата за отворените и затворените паркиралишта со кои стопанисува со цел да се зголеми контролата и безбедноста на паркиралиштата. Овој мрежен систем вклучува АНПР камери (камери за автоматско препознавање на регистарски таблички), сензори и мобилни АНПР камери кои ќе овозможат точна идентификација на возилата и ефикасна контрола и управување со пристапот од сите влезови на паркиралиштата.
„Колку за илустрација, според првичните проценки на територија на општина Центар ќе бидат поставени отприлика 1.500 камери во рок од 3 до 4 години. Овој проект значи врзување на цела мрежа од камери со што буквално ќе го имаме Центар на дланка. За жал, поради законските нормативи, ЈП ПОЦ нема да може да чува снимки од камерите, но се надеваме дека по воспоставување на мрежата, сите релевантни институции ќе се вклучат во проектот и со тоа ќе можеме безбедноста во централното градско подрачје да ја кренеме на едно сосема ново ниво“, објасни директорот на ЈП ПОЦ.
Освен капиталните инвестиции, директорот на ЈП Паркинзи на Општина Центар ги претстави и едукативните проекти и кампањи кои ќе бидат реализирани во 2020 година.
Заради минатогодишниот успех на проектот „Паркирај совесно!“, ЈП ПОЦ заедно со СВР Скопје, Град Скопје и Општина Центар ќе продолжи со реализација и оваа година и ќе ги едуцира најмладите идни возачи за правилно и прописно паркирање.
ЈП ПОЦ и Општина Центар, од денеска, започнуваат со нова кампања за подигање на јавната свест „Центар не е паркинг!“ која преку емотивни видеа ќе апелира до граѓаните да ги остават своите автомобили и повеќе да ги користат алтернативните превозни средства со што ќе придонесат многу во решавање на проблемот со паркирањето во општина Центар, намалување на загадувањето на животната средина и овозможување на хумано живеење во центарот на градот.
Потсетување дека Јавното претпријатие за јавни паркиралишта „Паркинзи на Општина Центар” претходно донесе Одлука за усвојување на новиот Ценовник на услуги и надоместоци на јавните паркиралишта со кои стопанисува со цел да се намали бројот на паркирани возила во централното градско подрачје и да им овозможи на жителите похумани услови за живеење.
Во Општина Центар живеат повеќе од 45.000 жители кои секојдневно се соочуваат со сериозен проблем со паркирањетои поминуваат по неколку часа во нивните автомобили барајќи слободно паркинг место. Со цел да им се овозможи на жителите полесен и побезбеден пристап до нивните домови, од денес, 8 јануари 2020 година, цените за паркинг за 1 час на комерцијалните паркиралишта со кои стопанисува ЈП Паркинзи на Општина Центар чинат 20 денари повеќе. Ова покачување се однесува само за паркиралиштата со наплата, додека цените за месечниот билет, дневната паркинг карта и останатите услуги на ЈП ПОЦ остануваат исти. Жителите на Општина Центар и понатаму ќе можат бесплатно да ги користат комерцијалните паркиралишта и монтажните гаражи со кои стопанисува ЈП Паркинзи на Општина Центар.
Од Општина Центар најавија уште еден интересен проект, а се однесува на одржувањето на јавната чистота преку селективно одложување отпад, собирање и негово рециклирање. Затоа, ЈП ПОЦ и Општина Центар во 2020 година ќе го воведат светскиот тренд во рециклирањето – повратни вендинг машини за пластични и стаклени шишиња со цел да ги мотивираат жителите да се вклучат во овој процес. До крајот на 2020 година ќе бидат поставени 27 повратни вендинг машини кои локациски ќе бидат распределени низ целата територија на општина Центар.
„Веќе се набавени 9 машини од планираните 27 и ќе започнеме со нивно поставување на почетокот на месец март. На овој проект работиме повеќе од една година и сметам дека ќе има големо влијание не само на развојот на нашето претпријатие, туку и за подигање на свеста кај граѓаните од потребата за рециклирање“, потенцираше директорот на ЈП Паркинзи на Општина Центар на почетокот на презентацијата.
Сите жители кои ќе се вклучат во процесот на селективно одложување отпад ќе добијат субвенции од општината во замена за пластични и стаклени шишиња односно за секое шише ќе добијат одреден прилив на пари на новата платежна картичка „GreenPay Card“ со која ќе имаат можност да купуваат со попуст во одредени маркети, продавници, локали и сл, или да плаќаат за услугите кои ги нуди претпријатието.
„За овој проект Општина Центар има предвидено субвенции во буџетот за 2020 година и за секое рециклирано шише се обезбедени 1,5 денари, а воедно обезбедени се и средства за останатите 18 повратни вендинг машини. Се надевам дека овој позитивен пример ќе биде еден почеток во кој понатаму ќе се вклучат и другите општини, институции, како и приватни компании, сè со цел Општината, Градот и Република Северна Македонија да ги направиме поубаво место за живеење“ додаде градоначалникот на Општина Центар, Саша Богдановиќ.