Кондензација и влага: Тивки непријатели на автомобилот!
Ако најдете влага во возилото, најважно е да ги најдете сите нејзини траги, а потоа и причините за нејзиното повторување, па дури потоа да се фрлите на решавање на проблемот
Влажни стакла во внатрешноста на автомобилот е особено чест проблем во зимските месеци, но како што добро знаат повеќето возачи, овој феномен не е редок и во други сезони. Секој од нас се справува со тоа на свој начин, така што некои се потпираат на моќта на вентилацијата, по можност потпомогната со климатизација, а некои развиле специјални методи за бришење и сушење на стаклото со текот на времето. Специјални сунѓери, крпи, весници или кујнска хартија…, или комбинација од сето погоре. И без разлика на која група припаѓаат, повеќето возачи всушност престануваат да размислуваат за кондензацијата веднаш откако ќе ги исушат прозорците и продолжат да возат. Не би било лошо да се информирате малку повеќе.
За почеток, за да се разбере кој е најдобриот начин за решавање на овој проблем, возачите треба да бидат запознаени со неговите причини. Едноставно, кондензацијата се јавува во ситуации кога има разлика во температурата и влажноста внатре и надвор од возилото, или кога ладна површина (како стакло) доаѓа во контакт со влажен и / или топол воздух. Во пракса, ова обично станува забележливо кога патниците влегуваат во ладен автомобил во зима: воздухот што го издишуваат е многу топол во однос на внатрешноста на возилото, и забележлива влага многу бргу ќе се појави на прозорците. Колку повеќе патници ќе влезат, јасно, толку побрзо и поизразено ќе се забележи овој феномен.
Важно е, сепак, да се знае дека кондензацијата во автомобилот може да настане дури и без присутни патници, што укажува дека има друг извор на влага во возилото, еден или повеќе. На пример, влагата ќе стане забележлива ако заборавите влажна маичка или друга облека или обувки во автомобилот по дожд, или ако влажните или натопените теписи не се исушиле доволно добро. Во овој случај, многу е јасно што треба да правите: најважно е да ги отстраните сите причинители за создавање влага во возилото и потоа да го исушите темелно, по можност со комбинација на различни методи.
Некои од најдобрите и најбрзите резултати за конвенционалното одмаглување на прозорците се обезбедува со употреба на клима уредот. Комбинацијата на топла струја и климатизација е од корист затоа што системот ја извлекува влагата од воздухот, што значи дека прозорците нема да имаат причина за замаглување. Но, што да направите ако нема климатизација во автомобилот или ако опишаниот метод не дава задоволителни резултати? Може да помогне да се користи едно од средствата наменети за извлекување на влага од воздухот или темелно проветрување и сушење на внатрешноста на возилото. Можно е да користите фен за коса (на пр. за влажни седишта) или да го оставите автомобилот отворен или барем прозорците на сонце неколку часа.
Но, ако имате влага во возилото, најважно е да ги најдете сите негови траги, а потоа и причините. Замаглените стакла се гледаат, но што е со влагата во теписите и под нив? Во багажникот и просторот за резервно тркало? Ако не сте погледнале таму долго време, веднаш проверете дали има траги од влага или, уште полошо, вода. Ова се обично најниските делови на возилото и ако истече вода или капе во автомобилот, што е можно ако станува збор за постаро возило со оштетени или испукани гумени заптивки на вратите или капакот на багажниот простор, лесно може да заврши токму таму. Истото важи и за малите пукнатини на фаровите: можеби мислите дека тие не можат да ви наштетат, но исто така може да пропуштат влага во возилото. Што може да значи ова, не треба да се објаснува: покрај каросеријата која може да се оштети од корозија, уште повеќе главоболки за сопственикот може да создадат проблемите со електричната енергија: многу автомобили, особено поновите, имаат чувствителна електроника на дното на багажникот, вклучувајќи батерии и жици со разни конектори.
Затоа, немојте да бидете мрзливи, туку погледнете темелно насекаде. Ако дејствувате навреме, би можеле да се ослободите од големи проблеми.