Honda повлекува голем број модели од европскиот пазар
Јапонскиот производител на автомобили Honda Motor објави дека ќе ја прекине продажбата на дизел автомобили во Европа најдоцна до 2021 година и ќе ги замени со електрични модели
На тој начин, Honda се приклучува кон групата на автомобилски компании кои го намалуваат производството на дизели за да ги испочитуваат строгите меѓународни регулативи за емисиите на штетни гасови.
Суспендирањето на продажбата на дизели во Европа е дел од стратегијата со која компанијата има за цел остварување на зацртана долгорочна цел односно зголемување на уделот на електричните автомобили во понудата од сегашните 10 на 66 проценти до 2030 година.
Регулативата на Европската унија предвидува до следната година емисијата на јаглерод диоксид од 95 проценти од автомобилите мора да се намали на 95 g/km од сегашниот просек од 120,5 g/km иако емисиите во последно време всушност се зголемени бидејќи потрошувачите се откажуваат од дизел-возилата што се горивно економични и се свртуваат кон теренските возила. Од 2021 година, ниту еден нов автомобил во ЕУ нема да може да испушта повеќе од 95 g/km CO2.
Поради сите овие причини, побарувачката за дизели резултираше во неизвесни изгледи за производството на Honda во Европа. Во февруари, јапонскиот производител објави дека во 2021 година ќе го затвори единствениот објект во Велика Британија во кој работат околу 3.500 работници.
Третиот по големина јапонски производител на автомобили до 2025 година планира да го намали бројот на модели за две третини, да ги намали глобалните трошоци за производство за 10 проценти и да ги пренасочи заштедите во истражувања и развој.