Honda и Sony ги здружуваат силите во изработка на електрични автомобили
Јапонските компании потпишаа договор за соработка со кој ќе воспостават стратешки сојуз со цел „влегување во нова ера на мобилност“, т.е. ќе основаат нова компанија која ќе произведува електрични автомобили
Јапонскиот технолошки гигант Sony и производителот на автомобили и мотоцикли Honda се согласиле да започнат стратешко партнерство со кое ќе зачекорат во новата ера на електрична мобилност и поврзани дигитални услуги. Како резултат на оваа соработка, ќе се создаде нова компанија, во која Honda и Sony ќе бидат косопственици, со цел развој, производство и продажба на електрични возила со батерии. Најавено е дека станува збор за возила со висока додадена вредност, кои ќе се комерцијализираат тесно поврзани со услугите за мобилност.
Се раѓа нов бренд
Новиот јапонски производител на автомобили затоа ќе биде лансиран уште оваа година, откако Honda и Sony ќе се договорат за сите детали. Во официјалната најава на партнерството се наведува дека ќе ја комбинира експертизата на Honda во развојот, производството на шасија и постпродажба, со експертизата на Sony во развојот на технологија за сликање, сензори, телекомуникации, мрежна технологија и технологија за забава. Оваа комбинација треба да доведе до нова генерација на услуги за мобилност кои се тесно поврзани со корисниците и околината.
Продажбата на првите модели на електрични автомобили од новата компанија, чие име се уште не е познато, ќе започне во 2025 година. Планот е заедничката компанија да го планира, дизајнира, развива и продава автомобилот, додека Honda ќе биде задолжена за неговото производство. Ќе произведува нов модел во постоечките погони. Независно од тоа, Sony одделно ќе развие платформа за услуги за дигитална мобилност и ќе ја направи достапна за новата компанија.
Honda веќе има план целосно да се префрли на електрични возила до 2040 година, но засега има само еден глобално достапен модел, Honda E. Кога станува збор за Sony, тие го презентираа својот прототип на електричен автомобил, Vision S, пред извесно време.