Formula 1 станала „клуб на синови на милијардери“, вели Хамилтон
Седумкратниот шампион за шпански АС вели дека би било невозможно да влезе во Formula 1 во сегашните услови, со оглед на статусот на неговото семејство
„Растејќи во нормално семејство на работничката класа, нема шанси да бидам тука. Момците со кои се борите имаат многу повеќе пари“, вели Хамилтон. „Ние мора да работиме за влезот во спортот да биде достапен, како за богатите, така и за луѓето со поскромни средства“.
Седумкратниот шампион израснал во Стивинаџ, Хертфордшир во општински стан, додека неговиот татко Ентони работел неколку работни места за да ја финансира помладата кариера на неговиот син, пред да биде регрутиран од McLaren кога имал 13 години.
Тимот го финансираше остатокот од неговата кариера, сè додека не се приклучи на Formula 1.
Во моментов на гридот се Канаѓаните Ленс Строл и Николас Латифи, како и Русинот Никита Мазепин, синови на милијардери. Макс Ферстапен, главниот ривал на Хамилтон на патеката и Мик Шумахер, се синови на поранешни Formula 1 возачи.
Хамилтон и Mercedes основаа фондација во обид да привлечат повеќе луѓе од етничките малцинства во мото-спортот, a покрај тоа, формираа и комисија која ја истражува слабата или скоро никаква застапеност на таленти од малцински заедници.