COP26: Само шест автомобилски гиганти се обврзаа на производство на исклучиво електрични автомобили до 2040 година
Шест големи производители на автомобили изразија максимална посветеност за постепено укинување на производството на возила што користат фосилни горива до 2040 година на глобално ниво, а до 2035 година на водечките пазари
Тоа е дел од глобалните напори за намалување на емисиите на јаглерод, а соопштението доаѓа од британската влада, која е домаќин на Конференцијата на Обединетите нации за климатски промени (COP26) во Глазгов (Шкотска).
Шесте производители за кои станува збор се Volvo, Ford, General Motors, Mercedes-Benz, Jaguar Land Rover и кинески BYD. Сепак, многу компании, вклучувајќи ги двете водечки, Toyota и Volkswagen, како и Stellantis, Honda, Nissan, BMW и Hyundai, кои беа изоставени од договорот, ги истакнуваат предизвиците што треба да се надминат во транзицијата кон иднината со нулта емисија.
Сето тоа отвора прашања за ефективноста на самата посветеност. Наводно, отсуството на Кина, САД и Германија е главната причина поради која многу производители на автомобили се откажале од своите обврски. Индустриски инсајдер вели дека многу производители на автомобили се претпазливи во поглед на потпишување, бидејќи тоа ги обврзува на скапа промена на технологијата, а тука им недостасува слична посветеност од владејачките структури, кои треба да обезбедат развој на потребната инфраструктура за полнење и мрежи за поддршка за електрични возила.
Според Financial Times, извори запознаени со настаните велат дека Volkswagen и Toyota не го потпишале договорот поради неподготвеноста на клучните земји да се приклучат на договорот. Во меѓувреме, BMW потврди дека исто така нема да го стави својот потпис. „Останува значителна доза на неизвесност во однос на развојот на глобалната инфраструктура, која треба да го поддржи преминот кон чисто електрични возила, со големи разлики меѓу пазарите“, вели баварскиот производител.
Вклучувањето на владите во транзицијата кон алтернативни горива е клучно за да се добие поддршка од автомобилските компании, кои почнуваат да инвестираат многу во електрични или водородни возила. Во извештајот се додава дека ниту еден од производителите на автомобили не е против укинувањето на емисиите на издувни гасови, но секој има специфични забелешки на договорот, велат неименувани извори.