Нафтените индекси во голем минус поради Кина: Ќе следи ли голем пад на цената на горивата?
Кинеските економски податоци и проценки се влошени поради рестриктивните политики за време на пандемијата со коронавирус
Понеделник е важен ден за формирање на цената на нафтата, односно сите важни индекси забележаа голем пад. Сировата нафта WTI и Brent паднаа за повеќе од 5% бидејќи кинеската централна банка ги намали каматните стапки за да ја зголеми побарувачката за стоки и услуги, а нејзините економски податоци и проценки се влошени поради рестриктивните политики за време на пандемијата со коронавирус. Радикалните заклучувања на цели градови оставија голема трага врз економијата. Исто така, инвестициите во недвижен имот во јули се намалени за 12,3%. Сега се очекува Кина да ја пропушти целната стапка на економски раст од 5-5,5% во втората половина од годината.
WTI падна на 87,22 долари за барел, што е намалување за 4,87 долари (-5,29%) на ден. Сировата нафта од типот Brent падна на 93,23 долари за барел, што е пад од 4,92 долари (-5,01%) на ден. На почетокот на руската инвазија на Украина, во првите денови на март, цената на барел нафта од типот Brent изнесуваше 139 долари. Сега цената на нафтата е на ниво од август минатата година.
Исто така, забележан е голем пад на производството во кинеските рафинерии, што предизвикува и намалување на побарувачката на сурова нафта. Кина увезува повеќе од половина од нафтата што ја троши, главно од Саудиска Арабија, Русија, Ирак и Оман.
Конечно, на падот на цената на нафтата влијаеше и одлуката на Иран дека во иднина може да размисли за потпишување нуклеарен договор. Иран е еден од најголемите производители на нафта во светот, а моментално е под ембарго бидејќи сè уште не го потпишала нуклеарниот договор, што легално би го спречило да развие нуклеарна бомба.