Истражување: Поскапи на почетокот, но поевтини на долг рок!
Електричните ванови се 25% попрофитабилни од дизелите
Според една неодамнешна студија на Европската кампања за транспорт и животна средина (T&E), просечното електрично комбе во Европската унија е 25% поевтино во текот на својот животен век од дизел алтернативата и покрај многу повисоките првични трошоци за електричниот погон.
Според истражувањето на 745 компании кои поседуваат комбиња во Европската унија, 84% од испитаниците би размислиле да користат електрична енергија, 36% веќе поседуваат едно комерцијално електрично комбе, 32% планираат да купат едно оваа година и 16% размислуваат да купат во следните пет години.
Од T&E велат дека пониските оперативни трошоци и зголемениот интерес за електрична енергија ги поддржуваат причините за посилно намалување на CO2 од дизел вановите. Во студија која опфатила шест земји (Франција, Германија, Италија, Полска, Шпанија и Обединетото Кралство), кои сочинуваат 76% од пазарот на ванови во ЕУ, T&E заклучуваат дека електричен ван чини 0,15 евра по километар, споредено до 0,2 евра за дизел алтернативата.
Исклучувајќи ги државните субвенции, T&E открива дека тие се уште се поевтини во пет земји, додека во Германија тековните трошоци се исти. Набавната цена на електричен ван е за 40- 55% повисока отколку за дизел модели, велат од T&E. Тој дополнителен почетен трошок е пречка за компаниите да се префрлат на електрични модели, иако „вкупните трошоци за сопственост“, вклучувајќи ги и трошоците за гориво, паѓаат со тек на годините.
Само 3% од вановите продадени во ЕУ минатата година биле целосно електрични, во споредба со 9% од патничките автомобили кои се соочуваат со построги стандарди за емисија на CO2. Европската комисија предложи сите нови ванови да имаат нула емисии до 2035 година, но според T&E, Европскиот парламент и земјите-членки на ЕУ мора да „испорачаат посилни цели за да го забрзаат прифаќањето на е-вановите“.